ازاي تشتغل مذيع في الراديو

ازاي تشتغل مذيع في الراديو
بداية لازم تعرف الفرق بين مذيع الراديو ومذيع التلفزيون
من حيث الأدوات والاتصال بالجمهور, فالراديو بيحتاج شخص ممتلك لأداة الصوت أكثر من مذيع التلفزيون ولكن مذيع التلفزيون بيحتاج حركة الجسم Body Language أكثر من الصوت, والموضوع راجع لطبيعة تواصل المذيع مع الجمهور ومع ما يقدمه

الفيديو بيتكلم عن مذيع الراديو وبعض صفاته , وده مش معناه ان مذيع التلفزيون يمشي لا يا حبيبي اقعد اتفرج للاخر ودوس لايك وشير الفيديو مع صحابك من باب الأمانة العلمية, وبعدين تروح تتعلم Body Language

صوت مذيع الراديو ” الصوت الإذاعي “

أول شئ بيتفاعل معاه الناس في مذيع الراديو هي نبرة الصوت وإيقاع الكلام
وده مش معناه ان في صوت حلو وصوت وحش أو نبرة تنفع ونبرة صوت لأ ولكن كل نبرة ولها موضوعات وجمهور وأوقات تناسبها , وتوظيف الصوت الصح هايضمن لك نسبة كبيرة من نجاحك كمذيع “وده تقدر تستعين بمتخصص فيه يقولك اذا كان اللون اللي بتقدمه مناسب لصوتك ولا لأ

أداء الخطاب الإذاعي :

الأداء الإذاعي زي غناء أغنية بيحتاج لتنويع في نغمتها وسرعتها ودرجتها علشان تنجح وتحرك إحساس ومشاعر الناس معاه

التأثير ” تأثير مذيع الراديو ”

كلم قلوب الناس قبل عقولهم
شغلتك كمذيع هي تمرير الأفكار والحقائق لعقول المستمعين وعلشان ده يحصل في محطة لازم تعدي عليها الأول وهي قلوبهم حرك مشاعر جمهورك , علشان يتقبلوا كلامك, الناس بتتأثر بالقصص الإنسانية والتجارب الشخصية والمواقف المؤثرة أكثر من تأثرهم بالأرقام والإحصائيات رغم أهميتها
مثال : ٣٣٪ من أطفال الصومال بيموتوا بسبب نقص الغذاء
من بين كل ٣ أطفال ابرياء في الصومال طفل واحد لن يعيش ليحقق أحلامه في المستقبل
الجملتين بيقولوا نفس المعنى ولكن الفرق كبير… مخاطبة المشاعر مهمة جدا لإحداث تغيير في مشاعر الجمهور

الحضور والقبول لمذيع الإذاعة :

براعة الاستهلال : ابدأ كلامك بطاقة أكبر من الطبيعية قليلا لجذب الإنتباه وتفنن في بداية كلامك, ابدأ بقصة ملهمة أو تاريخ أو معلومة نادرة للفت انتباه المستمع
ابتسم انت مسموع : الابتسامه طريق ممهد لقلوب الناس. إلا إذا كانت طبيعة برنامجك جدية أو بتنقل خبر مأسوي وقتها هاتبقى قلة ذوق
كلمهم بثقة, وعلشان تعرف تعمل ده اتعب على معلوماتك قبل ما تتكلم يعني رتب افكارك كويس وممكن تستعين بورقة لكتابة عناوين افكارك

الثقافة طريقك للعمل الإذاعي :

اسعى لعمل رصيد ثقة كافي عند مستمعيك, وصلهم لمرحلة انهم مايدوروش وراك في اللي بتقوله “ لأنك عودتهم إنك بتقول الصدق والحقيقة وبس أو على الأقل بتدور عليها بجدية وبتعتذر عن أخطاءك لو حصلت ”
العفوية والبساطة في اسلوب التعبير يعني ما تتفلسفش وتستعرض معلوماتك, الناس بتكره الشخص المتعالي حتى لو كان على حق

حضور الذهن وسرعة البديهة لتفادي الأخطاء سواء أخطاءك أو أخطاء ضيوفك, وركز طاقتك وقت ظهورك أمام الجمهور

واقرأ في كل شئ, وتخصص في ما تقدمه

سلامة مخارج الحروف واللغة :

مشاكل مخارج الحروف لها حل
لو انت من الأشخاص اللي عندهم مشكلة في نطق بعض الحروف فالموضوع مش ماسوي لدرجة كبيرة فمعظم مشاكل مخارج الحروف بتكون بسبب عدم معرفتك لكيفية نطقها بشكل صحيح او ممكن تروح لاستاذ تخاطب هيقيم المشكلة ويحلها معاك

أما لو المشكلة كانت بسبب تكوين في الحلق او تحديدا منطقة مخارج الحروف زي اللسان الملتصق في نهاية اسفل الحلق او شكل الاسنان فده بيحتاج تدخل جراحي, وانت وقرارك في الموضوع ده

ولكن للأمانة, بعض البرامج خاصة الترفيهية او المسابقات او الكوميدية او الفنية ما بتحتاجش سلامة مخارج الحروف ١٠٠٪ والتركيز فيها بيكون على عوامل ومهارات أخرى لدى المذيع

اللغة العربية للإعلاميين :

اللغة العربية وسلامتها, يمكن دراسة اللغة العربية للإعلامين وهي كورسات مكثفة في اللغة العربية, لو برنامجك بيتطلب نطق اللغة العربية ولو حتى في استشهاد باية او حديث

الشغف للشغل في الإذاعة : 

في الفترة الأخيرة الجمهور بقى واعي لدرجو تقدر تخليه يكشف مدى شغفك للي بتقدمه حتى لو كنت ممثل بارع هاتتكشف لانه خبير في الاستماع والمشاهدة
قدام الميكرفون ده المكان اللي بيفرق فيه الشغف, كونك جاد ومهني لن يساعد كثيرا في إقناع المستمع بيك فالشغف ثم الشغف

باقي كلمة في نقطة الشغف, اياك تتكلم عن مجهودك وتعبك قدام الناس سيبهم ينبهروا وبس .. الكلام عن المجهود والتعب بيفقد العمل بريقه

وظيفة المذيع :

وظيفة المذيع ليست مهنة من المهن اللي لها عدد ساعات عمل أو تارجت أو أجازات أو وقت تقدر تقول فيه انا كده عملت اللي عليا ارتاح بقى
ولكنها فن, اللي بيشتغل فيه بيفضل شغال لحد ما يرضى عن اللي بيقدمه مهما تطلب من عدد ساعات عمل

وأي فن من الفنون اللي بتشوفها وبتبهرك بيبقى وراها مجهود ضخم وجبار انت نفسك ممكن ما تصدقوش, حلقة الراديو اللي بتسمعها بيتكلف تحضيرها اسبوع وانت بتسمعها في نصف ساعة او ساعة تقريبا